அரியலூரில் செப்டிக் டேங்க் பணியில் ஈடுபட்டிருந்த 3 தொழிலாளர்கள் மூச்சுத்திணறி மரணம்

அரியலூர்: அரியலூர் மாவட்டம் செந்துறை பகுதியில், புதிதாகக் கட்டப்பட்ட கழிவுநீர் தொட்டிக்குள் (செப்டிக் டேங்க்) சிக்கி மூன்று கட்டுமானத் தொழிலாளர்கள் பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

செந்துறை வட்டாட்சியர் அலுவலகம் அருகே சுப்பிரமணியன் என்பவர் புதிய வீடு ஒன்றைக் கட்டி வருகிறார். கட்டுமானப் பணிகளின் ஒரு பகுதியாக, கழிவுநீர் தொட்டிக்கான கான்கிரீட் வார்க்கப்பட்ட பிறகு, அதற்கான மரச்சட்டங்களை (shuttering planks) அகற்றும் பணியில் தொழிலாளர்கள் ஈடுபட்டிருந்தனர். தகவல்களின்படி, அந்த மூன்று தொழிலாளர்களும் கழிவுநீர் தொட்டிக்குள் இறங்கியபோது, ​​மூச்சுத்திணறல் ஏற்பட்டு திடீரென மயங்கி விழுந்தனர்.

தகவல் அறிந்ததும் தீயணைப்பு மற்றும் மீட்புப் படையினர் சம்பவ இடத்திற்கு விரைந்து சென்று, ஆபத்தான நிலையில் இருந்த மூன்று தொழிலாளர்களையும் மீட்டனர்.

பின்னர், அவர்கள் மூவரும் சிகிச்சைக்காக செந்துறை அரசு மருத்துவமனைக்குக் கொண்டு செல்லப்பட்டனர். ஆனால், அவர்களைப் பரிசோதித்த மருத்துவர்கள், அவர்கள் ஏற்கனவே இறந்துவிட்டதாகத் தெரிவித்தனர். இதையடுத்து, உடல்கள் பிரேதப் பரிசோதனைக்காக அனுப்பி வைக்கப்பட்டன.

மேலும் படிக்க | 100 சார் பதிவாளர் அலுவலகங்களுக்கு சனிக்கிழமை இனி விடுமுறை.. தமிழக அரசின் அறிவிப்பு

உயிரிழந்தவர்கள், செந்துறையைச் சேர்ந்த தச்சர் கே. ராமச்சந்திரன் (57) மற்றும் திருவாரூர் மாவட்டத்தைச் சேர்ந்த கொத்தனார்கள் கே. பாஸ்கர் (45), கே. தினகரன் (60) ஆகியோர் என அடையாளம் காணப்பட்டனர்.

வெள்ளிக்கிழமையன்று, தொட்டியின் மீது கான்கிரீட் தளம் அமைக்கும்போது பயன்படுத்தப்பட்ட மரப்பலகைகளையும் தாங்கும் கம்பங்களையும் பாஸ்கர் மற்றும் தினகரன் ஆகியோர் அகற்றும் பணியில் ஈடுபட்டிருந்தனர். அப்போது, ​​இருவருக்கும் மூச்சுத்திணறல் ஏற்பட்டு அவர்கள் மயங்கி விழுந்ததாகக் கூறப்படுகிறது.

அவர்களை மீட்கும் முயற்சியில் ராமச்சந்திரன் தொட்டிக்குள் இறங்கினார்; ஆனால், உள்ளே இருந்த சூழலால் அவரும் மயக்கமடைந்தார். அங்கு இருந்த சுப்பிரமணியன், இதுகுறித்து காவல்துறைக்கும் தீயணைப்புத் துறையினருக்கும் தகவல் தெரிவித்தார்.

இது தொடர்பாக செந்துறை காவல்துறையினர் வழக்குப்பதிவு செய்து, உயிரிழப்புக்கான காரணங்கள் குறித்து விசாரணை நடத்தி வருகின்றனர்.

மேலும் படிக்க | Tamil News LIVE: பரபரக்கும் இடைத்தேர்தல் களம்; இந்தியா - பாகிஸ்தான் பலப்பரீட்சை

பீகாரிலும் இதே போன்ற சம்பவம்

கடந்த மாதம் பீகாரின் கோபால்கஞ்ச் மாவட்டத்திலும் இதேபோன்றதொரு சம்பவம் நிகழ்ந்தது. அங்கு கழிவுநீர் தொட்டிக்குள் மூச்சுத்திணறி நான்கு தொழிலாளர்கள் உயிரிழந்தனர். கோபால்பூர் காவல் நிலைய எல்லைக்குட்பட்ட சவான்ஹாய் ஜகதீஷ் கிராமத்தில், புதிதாகக் கட்டப்பட்ட கழிப்பறைத் தொட்டியிலிருந்து கட்டுமானச் சட்டங்களை அகற்றும் பணியில் ஈடுபட்டிருந்தபோது இச்சம்பவம் நடந்தது. அந்தத் தொட்டி நீண்ட காலமாக மூடப்பட்டிருந்ததால், உள்ளே நச்சு வாயுக்கள் தேங்கியிருந்ததே இந்த உயிரிழப்புகளுக்குக் காரணமாகக் கூறப்படுகிறது.

கழிவுநீர் தொட்டிகள் பலி பீடங்களாக மாறுவது ஏன்?

புதிதாகக் கட்டப்பட்ட தொட்டிகளாக இருந்தாலும், பல நாட்களோ அல்லது வாரங்களோ அவை மூடப்பட்டிருந்தால், வேதிவினைகள், புதிய பெயிண்ட் அல்லது அருகிலுள்ள குழிகளில் இருந்து வரும் அழுகும் கரிமப் பொருட்கள் ஆகியவற்றின் காரணமாக உள்ளே இருக்கும் ஆக்சிஜனை அவை பயன்படுத்திக்கொள்கின்றன.

இப்படிப்பட்ட நேரங்களில் மனிதர்கள் உள்ளே நுழையும்போது, ஆக்சிஜன் பற்றாக்குறை, அதிக அளவிலான ஹைட்ரஜன் சல்பைடு வாயு ஆகியவற்றின் காரணமாக சுவாச மண்டலம் முடக்கப்படுகின்றது. சில சமயங்களில் ஒரே ஒரு முறை சுவாசிப்பதிலேயே உடனடியாக மயக்கம் ஏற்படும் வாய்ப்பு அதுகமாகிறது.

மேலும் படிக்க | மின்தடை பிரச்னையா? உடனடி தீர்வுக்கு வாட்ஸ் அப்பில் சூப்பர் வசதி.. புகார் எண் அறிமுகம்